Wisata Konservasi Lan Edukasi Pesisir Kedung Derus

Andi Sep Kurniawan (dipublikasikan pada Kamis, 17 Juni 2021 08:45 WIB)
- Wisata



Lahan tepat untuk iklan anda di sini.

Hubungi: skb@belambangan.com atau WA telp 0811843457


Jumlahe jujugan kelenceran (wisata) ring taun 2020 sakat ana pageblug covid-19 keitung mudhun teka taun sakdurunge. Mudhune jujugan wisata merga anane aturan pemerintah hang ngongkon masarakat kudu tetep ring umah bain. Setolane kebijakan iku mauka, kuntupe menungsa saya nyithikaken. Salah sijine jujugan wisata hang keneng awune yaiku Pesisir Kedung Derus.

Taun 2021 Pesisir Kedung Derus hang ana ring Desa Pondoknongko wis mangkat dandan maning. Anane kebijakan anyar ngulihi wisata dibuka naming kudu dilengkapi aturan protokol kesehatan covid-19, digawe kesempatan kanggo ngelola wisata hang wis suwi turu. Lalare hang melebu ring Kelompok Sadar Wisata (Pokdarwis) Maju Bersama lan Pokmaswas Deling Seganten uga Pemerintah Desa Pondoknongko wis njangkah rada mengarep, siyap nerima jujugan wong kelenceran maning.

Wisata Konservasi lan Edukasi Pesisir Kedung Derus mula durung akeh hang ngeweruhi. Kudu nunggang jukung utawa perahu kadhung arep melebu ring pesisire mergane Kedung Derus kelebu kaya pulo hang diubengi rawa lan banyu pesisir. Hing ngenteni suwi, paling kira-kira pitung menit awak dhewek gadug ring pelataran lawang kori Kedung Derus. Sakliyane potensi wisata jukung, Pondoknongko uga dadi pesisir hang ditekani penyu. Mulane label wisatane iki 'Konservasi lan Edukasi'.

Durung gadug ring bungase ulan juni, wis ana petang penyu hang munggah ring pesisir Kedung Derus sak perlu arep ngendhog. Tekane wayah dalu kira-kira sakmarine isak. Penyu hang ndharat mau biyasahe ngendhog kira-kira 80 iji sampek 120-an iji. Endhoge dijuwut aju dideleh ring panggonan penangkaran penyu ring pesisir Kedung Derus. Jenis penyune hang paling akeh mara yaiku penyu ijo. Taun sore kira-kira ana 23 penyu hang munggah ring pesisir.

Wisata konservasi lan edukasi Kedung Derus mula durung kesuwur kaya wisata liyane. Naming ya hing usah adoh-adoh umpamane kepingin nunggang perahu kaya ring bedhul, kepingin weruh wit cemara kaya ring Pesisir Cemara, kepingin weruh penyu kaya ring sukamade, cukup ring Kedung Derus Desa Pondoknongko, 10 menit teka pusat kota. Wis ana kabeh.

Kedung Derus seru bisane dienggo panggonan edukasi kanggo anak, dienggo kumpul-kumpul sak kancaan lan dulur-dulur, bisa dienggo kegiyatan rapat ring njaba ruang lan liya-liyane. Pasilitase uga ya wis lengkap, gesibu segitiga, kantin utawa warung, musala, cedhing lan panggonan selfie hang apik-apik. Mulane sing usah adoh-adoh cukup ring Kedung Derus bain.

Redaktur menerima berbagai tulisan, kirimkan tulisan anda dengan mendaftar sebagai kontributor di sini. Mari ikut membangun basa Using dan Belambangan.


Editor: Hani Z. Noor