Wito Laros, Anake Magersari Glenmore Ngurusi Perhutanan Sosial Nasional

Antariksawan Jusuf (dipublikasikan pada Jumat, 16 April 2021 07:45 WIB)
- Tokoh



Tepak ana diskusi virtual kanggo mengeti Dina Bumi tingkat nasional tanggal 22 April engko, hang arep dibukak ambi pidhato teka Mendagri Tito Karnavian, ana salah siji pembicarane, yaiku Suwito. Cumpu iyane lare teka Genteng, Banyuwangi.
   Ring acara diskusi hang ditemani "Kolaborasi Untuk Keberhasilan Program Perhutanan Sosial" iku ana pisan pembicara liyane yaiku Dirjen Pembangunan Daerah Kemendagri Dr. Hari Nurcahya Murni lan Bupati Lumajang Thoriqul Haq.
   Kang Wito (iyane dhemen nulis arane "Wito Laros" nong media sosial), warga Ikawangi Tangerang Selatan iki mula lulusan Institut Pertanian Bogor (IPB taun 1989) ring fakultas Peternakan. Naming iyane kelibet ring Perhutanan Sosial wis 25 taun lawase.
   Sapa nyangka iyane bengen emeh hing bisa mangkat nang Bogor sakuwise lulus SMA Genteng, merga bapake mung magersari hang nggarap tanah alas Perhutani. Iyane lair ring dusun Sugihwaras pinggir alas Wonoasih, desa Bumiharjo (pemekaran desa Sumber Gondo/Sumber Wadung), kecamatan Glenmore.
   Bengene tepak kelas 2 SMA Maron Genteng iyane tau dianggep wanen nantang gurune hang aran Pak Muniri, merga hing bisa mbayar iuran 500 rupiah kanggo perpisahan kakak kelas. Taping ya mula iyane hing duwe picis. Wong tuweke wis milu transmigrasi nang Lampung tepak iyane kelas 1 taun 1980. Kanggo nyukupi urip sedina-dinane iyane ngarit suket kanggo sapine uwake, milu nggebros pari, macul lan menek kelapa.
   Taping sarta weruh kahanane, malah pak Muniri hang ngelungaken welase lan ngajari iyane njait kelambi. “Dulu bapak juga mandiri dengan menjahit sewaktu kuliah , mudah-mudahan ini nanti bisa menjadi modalmu untuk mandiri.”

   Sakat iku tambah akeh guru-guru hang welas. Pak Sung Masyhuri, wali kelas hang uga guru bahasa Inggris, ngusulaken iyane ulih beasiswa lan iyane hing mbayar spp maning. Malah jatah beras Pak Sung hang 12 kg saben ulan diwakaken nang iyane tepak iyane manggon ring Pondok Miftahussa’adah Maron. Ruwahe pak Zuhroni, guru Agama ngewani seragam lan sepatu. Emane prestasine ya apik. Iyane bisa juwara kelas.
   Taun 1983 iyane ulih panggilan melebu IPB liwat jalur tanpa tes. Lan kanggo mangkat nang Bogor iyane rungu gok  guru-gurune nggendhong indhit urunan. Pak Sung Masyhuri, pak Muniri, pak Suryanto MTK, pak Armanu, pak Elmi "Elteha" Genteng lan uga guru liyane. Malah guru Kesenian pak Armanu nitipaken surat kanggo dulure hang dadi dosen ring IPB yaiku Prof. Syamsu’ud Sajat, Ahli benih IPB. Iyane nggoleti umahe Prof Syamsu’ud Sajad ring Kompleks Perumahan Dosen IPB Dramaga. Taping cumpune pak Prof. Syamsu'ud ya magih repot merga anake buru melebu kuliah pisan. Iyane malah ditulung Rektor III IPB, Dr. Norman Razif Azwar, ngurus beasiswa Peningkatan Prestasi Akademik (PPA) Rp 25.000 sak ulane lan kerasa seru kanggo mbantu biyaya uripe ring Bogor. Ana pisan wong ring Paguyuban alumni "SMaron" hang ana ring Bogor hang milu mbantu yaiku mbok Titik Dwi Renaninggalih hang lulus IPB taun 1984.  Mbok Titik lan lakine Mas Hadi Suprapto teka Tuban aju dadi mbok lan kakang angkat ring Bogor.
   Saiki kang Wito megawe ring Kemitraan bagi Pembaruan Tata Pemerintahan di Indonesia. Lembaga iki diedegaken ring  UNDP-United Nation of Development Program (Badan Pembangunan PBB) bareng ambi BAPPENAS. Wis macem-macem posisine: Project Manager of Community Empowerment (2008-2009), Program Officer CBFM (2009 - 2011), Government Relation and CSO Engagement (2011-2019).
  Aju iyane milih dadi konsultan paruh waktu minangka Tenaga Ahli Spesialis Perhutanan Sosial (2020-2021).
  Tugase iku wis nggawa iyane keliling 31 propinsi ring Indonesia, kari telu hang durung, Kalimantan Utara, Gorontalo, Maluku Utara. Iyane uga wis ngambah negara manca: Singapura (1995), Philipine (1998 & 2004), Timor Leste (2002 & 2003), Nepal (2009).
   Sakat Januari 2020, iyane fokuse ring  focal point nasional Pokja PPS (Pokja Percepatan Perhutanan Sosial). Pokja PPS iki diwani SK teka dirjen Perhutanan Sosial dan Kemitraan Lingkungan sakat 2017.  Uga minangka anggota Tim Penggerak Percepatan Perhutanan Sosial (TP2PS) hang diwani SK teka direktur Penyiapan Kawasan Perhutanan Sosial, sakat 2018 seperene.
   Pengalamane megawe ring tingkat nasional iku merga iyane tau ndhampingi masarakat petani hutan damar ring Pesisir Krui, Lampung taun 1995-1999.

Lahan tepat untuk iklan anda di sini.

Hubungi: skb@belambangan.com atau WA telp 0811843457


Poto: Kang Wito Laros ambi Keluwarga angkate Pak Drs. Sung Masyhuri, walikelase ring SMA Maron Genteng.

Redaktur menerima berbagai tulisan, kirimkan tulisan anda dengan mendaftar sebagai kontributor di sini. Mari ikut membangun basa Using dan Belambangan.


Editor: Antariksawan Jusuf