Alihbasa Ngewani Panggonan Dhuwur ring Karya Basa Dhaerah

Antariksawan Jusuf (dipublikasikan pada Minggu, 21 November 2021 11:00 WIB)
- Laporan



Kegiyatan alihbasa karya-karya basa dhaerah mengarepe bakal diwani panggonan kanggo ngewani wigati lan kepercayaan nyang penulis basa dhaerah.
"Magih akeh sumber-sumber hang ketulis lan ana ring masarakat hang kudune diduduhaken ring ruang publik hang lebih wera," jare Kepala Balai Bahasa Jawa Timur Dr. Asrif, M. Hum ring sambutane tepak mbukak Lokakarya Naskah Terjemahan Buku Karya Sastra Berbahasa Daerah ring hotel Aria Surabaya dina Sabtu sore.
"Kene iki ngeregani nong para pegiyat basa dhaerah merga program iki hing mung ngelindhungi basa dhaerah, taping merga asile nggarai wong-wong dhemen  basa dhaerah," jare pak Asrif nganggo basa Indonesia.
    Ana 20 naskah basa dhaerah hang dialihbasa lan arep diterbitaken Balai Bahasa Jawa Timur (BBJT) taun iki. Naskah basa Jawa ana 14, basa Medura 4 lan basa Using 2 yaiku Pereng Puthuk Giri karyane Kang Ujik (Abdullah Fauzi) lan Markas Ketelon anggitane Antariksawan Jusuf. Pereng Puthuk Giri hang dialihbasa ring  Urip Limartono Aris nyang basa Indonesia dadi Lereng Bukit Giri dene Markas Ketelon hang dialihbasa ring Nur Holipah dadi Markas Tiga Petualang.
   Minangka tukang alihbasa Urip lan Holip dipilih liwat saringan. Ana 269 calon penerjemah hang ndaptar diseleksi dadi 154 lan teka iki dipilih maning teka karyane dadi 15 uwong.
   Iwuh BBJT iki hang kawitan dianakaken taping ndeleng apike kegiyatan iki pak Asrif ngarepaken saran lan penemu teka wong-wong kanggo mbecikaken paran kadhung ana kurange.
   Pereng Puthuk Giri diterbitaken ring Dewan Kesenian Blambangan (DKB, taun 2005), dene Markas Ketelon diterbitaken Cakra Press (CP, 2015). Markas Ketelon iki tau pisan dibagi gratis nang pirangane sekolahan ring Banyuwangi hang sebagiyan disokong danane ambi Ikatan Keluarga Banyuwangi (Ikawangi) Pusat Jakarta.
   

Redaktur menerima berbagai tulisan, kirimkan tulisan anda dengan mendaftar sebagai kontributor di sini. Mari ikut membangun basa Using dan Belambangan.


Editor: Hani Z. Noor