Tukang Sarang Udan Amerika
Antariksawan Jusuf (dipublikasikan pada Rabu, 06 Mei 2026 06:17 WIB)
- Laporan
Saben ana wong duwe gawe utamane ring wayah rendheng, biyasahe nekakaken tukang sarang utawa guyonane "menteri penerangan." Sak using-usinge ngunduki lobok lan kembang ring semat aju ditancepaken nong lemah kelawan ndonga njaluk nong Pengeran muga-muga dinane terang.
Ritual nyarang udan iki wis anjerah hing mung ring Banyuwangi. Bengen ika tau tepak gelaran galapan sepidhah montor ring Lombok ya tau ngganggo tukang sarang.
Setemene kelendi nalare gok udan bisa diendhegaken mung ambi menyan lan mantera, ya hing weruh juntrunge.
Cumpune kedadeyan "modifikasi cuaca" tau pisan dilakoni ambi tentara Amerika tepak perang ambi Vietnam.
Sak perlu ngalahaken tentara Vietnam, Amerika ring Operation Popeye (1967–1972) nganggo alat hang bisa merujukaken winihe mega. "Modifikasi cuaca" hang kesuwur kelawan aran "motorpool" iki kecathet minangka hang kawitan cuaca dienggo gamane perang. Kelawan ngedhunaken udan sak akeh-akehe ring dalan sak ubengabe kutha Ho Chi Minh dikarepaken dalanane dadi belethok, nggarahi lemahe logrok lan ngendheg lakune kendaraan militere Vietnam Utara.
Masiya nyatane, udan gedhe iku hing bisa nyegah lakune barang lan pasukan Vietnam. Naming akibate ana belabur gedhi ring taun 1971 hang ngerusak panenane wong tani ring kana.
Hing maido, sampek PBB taun 1977 nggelar konperensi hang asile ngelarang "modifikasi cuaca" minangka gamane perang.
Kadhung ring Vietnam ditekakaken udan, sak walike Amerika nggawe terang hing ana udan ring Iran. Sampek pemerintah Iran wis mikir ngongkon ngungsi masarakat ring ibukota Teheran merga banyune padha asat.
Sakmareke Iran nggempur pangkalan militer Amerika ngerusak sistem radar TPY-2 ring negara-negara Arab, kelebu hang ana ring Uni Emirat Arab, kontan udan lan salju teka maning. Wong-wong padha girang udan-udanan.
Udan ngebeki dam Darbendakan hang maune banyune wis asat, saiki malah belabur wis ngebeki 100 persen kapasitase kira-kira telung miliyar kibik.
Jare medhiya-medhiya ring Iran radar hang wis dirusak iki maune bisa "nyolong mega" hang dienggo modifikasi cuaca mau. Malah hing mung nyolong mega naming uga ngilangaken salju.
Embuh kedadeyan setemene kelendi, temenan tah langite Iran disarang radare Amerika? Tah mula ketepakan udane wayahe mudhun.
Redaktur menerima berbagai tulisan, kirimkan tulisan anda dengan mendaftar sebagai kontributor di sini. Mari ikut membangun basa Using dan Belambangan.
