Ikawangi Arep Menyang Mancat Ring Banyuwangi

Antariksawan Jusuf (dipublikasikan pada Kamis, 06 Januari 2022 13:36 WIB)
- Laporan



Sak perlu ngarepaken tekane dina mengeti 50 taun Ikatan Keluarga Banyuwangi (Ikawangi) Pusat Jakarta ngetap wulu arep nggelar acara "Ikawangi menyang mancat ring Tanah Using."
  Acara mancat sepidhah teka Rogojampi nuju nyang pendhapa Saba Swagata direncanakaken tanggal 19 Maret. Rombongan iki dipiloni sapa bain hang gelem milu, hing sewates wong Ikawangi Pusat Jakarta. Malah komunitas-komunitas gowes hang ana ring Banyuwangi ya bisa milu pisan.
"Hang milu engko hing mung Ikawangi Pusat taping Ikawangi Nusantara lan Ikawangi negara manca," jare kang Bambang Sugiyono, Ketua Umum Ikawangi Pusat Jakarta tepak rapat panitiya nganggo zoom.
   Sakwise nggadug ring pendhapa arep ana sambutan-sambutan teka Bupati lan ketua Ikawangi Pusat uga gelar pertunjukan kesenian hang disiyapaken ring Ikawangi. Ana uga santunan kanggo lalare atim.
  Ikawangi Nusantara saiki semebar teka Aceh sampek Papua, malah ana hang sampek nang negara manca kayata Malaysia, Hongkong, Taiwan, Eropa sampek Amerika Serikat.
   Dalune, arep dianakaken acara dhewek ring Vila Tirto Arum Songgon duwene ketua komunitas Gowes Ikawangi kang Sujiono.
   Sedurunge tanggal 19 Maret, ana rombongan husus hang mancat sepidhah teka Jakarta sampek Banyuwangi nggawa bendhera Indonesia, Ikawangi lan Pedalatos yaiku aran mereke komunitas gowes Ikawangi.
   Rombongan kirab bendhera iki dikarepaken wis bisa gabung bareng ambi rombongan pemancat hang wis nganteni ring Rogojampi.
   Sak dawane dalan, dikarepaken anggota Ikawangi-Ikawangi hang diliwati, bisa bareng sepidhahan ambi rombongan hang akehe limang sepidhah.
   Ikawangi Pusat Jakarta diedegaken tanggal 16 September 1972 kelawan aran Pewangi Jaya (Paguyuban Warga Banyuwangi Jakarta Raya). Dadi ulan September ngarep wis kaitung 50 taun. Tanggal iku ditetepaken merga iku hang dadi bibit perkawit anane Ikatan Keluarga Banyuwangi (Ikawangi). Taping saya suwi paguyubane saya kimples. Sampek-sampek antarane taun 1985-1990 nana kegiyatan blas.
   Aju taun 1991, ana putera Banyuwangi
H. Abdul Kahfi diangkat dadi walikota Jakarta Pusat.
    Sak mareke upacara sukuran ring umahe, Jalan Diponegoro, wong-wong sepakat milih H. Boesairie Abdullah minangka ketua paguyuban Banyuwangi hang anyar. Lan aran Pewangi Jaya diuwah dadi Ikatan Keluarga Banyuwangi (Ikawangi) seperene.

   

Redaktur menerima berbagai tulisan, kirimkan tulisan anda dengan mendaftar sebagai kontributor di sini. Mari ikut membangun basa Using dan Belambangan.


Editor: Hani Z. Noor