Ikawangi Mancat Ring Banyuwangi Melebu Agenda B-Fest 2022

Antariksawan Jusuf (dipublikasikan pada Sabtu, 15 Januari 2022 10:15 WIB)
- Laporan



Acara mancat sepidhah hang arep dianakaken Ikatan Keluarga Banyuwangi (Ikawangi) Jakarta arep dilebokaken ring kalender Banyuwangi Festival 2022.
"Kelawan sinau teka suksese Festival Gandrung Sewu Nusantara hang dipiloni Ikawangi sak nusantara malah teka manca negara pisan, kegiyatan sepidhahan iki dilebokaken dadi salah siji agenda B-Fest," gedigu jare Kepala Dinas Kebudayaan dan Pariwisata pak Yanuarto Bramuda.
   Pak Bram ngomong gok festival Gandrung Sewu Nusantara dielem ring Kementrian Pariwisata merga sak njerone pageblug magih bisa nggelar acara hang bisa dipiloni wong-wong sak nusantara.
   "Iku ya inovasi, barang hang itungane anyar. Acara sepidhahe iki Hun arani Ikawangi Cycling Nusantara," tambah pak Bram nyang reportere belambangan.com.
   Ulan Desember 2021 kepungkur minangka festival nutup taun lan sekaligus kanggo mengeti Harjaba hang kaping 250, Festival Gandrung Sewu digelar kelawan cara anyar. Hing nong pesisir Boom, naming dianakaken kelawan virtual hang dipiloni hing mung penari hang ana ring Banyuwangi taping ana 25 Ikawangi hang kesebar sak nusantara.
  Ana 25 Ikawangi hang miloni acarane teka Batam, Balikpapan, Banjarbaru, Bontang, Denpasar, Lampung, Jakarta, Jayapura, Jambi, Jember, Kediri, Kendari, Kupang, Lampung, Medan, Malang, Mamuju Tengah, Mimika, Nabire, Palembang, Pekanbaru, Palembang, Sorong, Surabaya, Tarakan, Hongkong lan Taiwan. Panggonan njugede gandrung dipilih ring panggon hang dadi ikon saben-saben dhaerah, kayata Monas teka Jakarta lan lapangan Braja Sandi ring Bali.
   Ngarepaken tekane dina mengeti 50 taun Ikawangi Pusat Jakarta arep nggelar acara mancat sepidhah teka Rogojampi nuju nyang pendhapa Saba Swagata, direncanakaken tanggal 19 Maret. Rombongan hang milu mancat iki bisa dipiloni sapa bain hang gelem milu, hing sewates wong Ikawangi Pusat Jakarta. Malah komunitas-komunitas gowes hang ana ring Banyuwangi ya bisa milu.
"Hang milu engko hing mung Ikawangi Pusat taping Ikawangi Nusantara lan Ikawangi negara manca," jare kang Bambang Sugiyono, Ketua Umum Ikawangi Pusat Jakarta.
   Sedurunge tanggal 19 Maret, ana rombongan husus hang mancat sepidhah teka Jakarta sampek Banyuwangi nggawa bendhera Indonesia, bendhera Ikawangi lan Pedalatos yaiku aran mereke komunitas gowes Ikawangi.
   Rombongan kirab bendhera iki dikarepaken wis bisa gabung bareng ambi rombongan pemancat hang wis nganteni ring Rogojampi.
   Sak dawane dalan, dikarepaken anggota Ikawangi-Ikawangi hang diliwati, bisa bareng sepidhahan ambi rombongan hang teka Jakarta.
   Ikawangi Pusat Jakarta diedegaken tanggal 16 September 1972 kelawan aran Pewangi Jaya (Paguyuban Warga Banyuwangi Jakarta Raya). Dadi ulan September ngarep wis keitung 50 taun. Tanggal iku ditetepaken merga iku hang dadi bibit perkawit anane Ikatan Keluarga Banyuwangi (Ikawangi). Taun 1991, aran paguyubane diuwah teka Pewangi Jaya dadi Ikatan Keluarga Banyuwangi seperene.

   

Redaktur menerima berbagai tulisan, kirimkan tulisan anda dengan mendaftar sebagai kontributor di sini. Mari ikut membangun basa Using dan Belambangan.


Editor: Hani Z. Noor