Ikawangi Tangsel Milih Ketua Anyar

Antariksawan Jusuf (dipublikasikan pada Senin, 10 Januari 2022 10:30 WIB)
- Laporan



Sakwise ditinggal ketuwane hang pindhah ring Belitung, Ikatan Keluarga Banyuwangi (Ikawangi) korwil Tangerang Selatan nggelar Musyawarah Luar Biasa kanggo milih ketuwane hang anyar.
   Kepilih ring iwuh iku mbok Titin Iriani hang sak suwene iki wis njabat minangka bendhahara organisasi.
   "Isun ngerasa girang lan terharu merga kanca-kanca wis percaya nang Isun kanggo ngelakokaken organisasi iki. Muga-muga Ikawangi Tangsel iki saya jejeg, wargane saya guyub lan rukun," gedigu jare mbok Titin.
   Ring pemilihan iku ana 32 anggota hang bisa nekani acarane lan 10 wong hang milih liwat jalur WA, merga kabeh diwani kesempatan hang padha. Ana 32 suwara hang milih mbok Titin, 7 milih wakil ketua kang Sofyan Osing, 2 milih kang Agus Sumadi lan 1 suwara hing sah.
Korwil Tangerang Selatan iki salah sijine koordinator wilayah hang ana ring payunge Ikawangi Pusat. Sakat telung ulan kepungkur ditinggal ketuwane kang Dodot Trias hang pindhah nyang Belitung.
    Sak teruse, ketuwa hang anyar kudu milih penguruse lan dilantik ring Ketua Umum Ikawangi Pusat.
    Ikawangi Tangsel wis nggarap pirangane kegiyatan sosial kayata mbecikaken umah, mbecikaken musala, sedekah Jemuah Berkah lan liya-liyane.
   Kanggo nggedhekaken organisasine, kapanane wis ngumpul sak perlu nata nggawe aturan organisasi. Naming mengarepe kudu ditata maning nambahi aturan-aturan hang durung ana.
   Ikawangi Tangsel iki bengene ana ring ngingsore Ikawangi Tangerang Raya taping merga wilayah lan akeh wong-wonge hang manggon ring Tangerang Selatan, kerenteg ngedegaken organisasi dhewek kewujud tanggal 12 Juli 2020. Ikawangi korwil Tangsel saiki wis duwe emeh 100 anggota.

Redaktur menerima berbagai tulisan, kirimkan tulisan anda dengan mendaftar sebagai kontributor di sini. Mari ikut membangun basa Using dan Belambangan.


Editor: Hani Z. Noor