ISG Nduwe Tekad Nggedhekaken Organisasine

Antariksawan Jusuf (dipublikasikan pada Selasa, 04 Januari 2022 08:36 WIB)
- Laporan



Ikawangi Sumatra Grup (ISG) dina iki, 4 Januari, mengeti dina dadine hang kaping telu kelawan kekarepan nggedhekaken organisasine iki hang nyerambah sangang propinsi teka Aceh sampek Lampung.
   Perayaane engko tanggal 9 Januari dianakaken ring sekretariat ISG Jalan Pesantren, Parit Indah, Pekanbaru, jare Ketua ISG kang Muhammad Nurhidayat.
"Sederhana bain merga kondhisine magih gedigi, durung normal," jare kang Nurhidayat, hang diangkat dadi ketua ISG sakat tanggal 30 Oktober 2021.
   Ring acara engkisuk iku, sakliyane arep ditekani limang koordinator wilayah (korwil) hang ana ring Riau, uga arep ana pitung korwil hang magih persiapan pembentukan.
   Ring daptar undhangane ana kepala dinas Kebudayaan dan Pariwisata Kota Pekanbaru, lan ormas Persatuan Masyarakat Jawa Timur, Persatuan Masyarakat Jawa Tengah lan Ikatan Keluarga Jawa Riau.
   Jare Kang Nurhidayat hang asal Kelampok kutha Banyuwangi iki sak suwine pageblug mula akeh kegiyatan Ikawangi hang milu kesandhet. Kegiyatan hang sipate kumpul-kumpul, acara pelantikan rada disuda merga ana keterbatasan wektu lan prokes.
   Bareng acara tanggal 9 kesuk iku uga ana Pelantikan korwil Palembang, Banyuasin, Pekanbaru lan Pelalawan.
   ISG diedegaken tanggal 4 Januari 2019 wis ulih ijin teka Kemenkumham, hang wilayahe sangang propinsi lan 140 kabupaten. Hang paling akeh anggotane ana ring Lampung kira-kira 70.000 uwong, Sumatera Selatan 50.000, dene hang ana ring Riau kira-kira papat sampek limang ewu uwong.
   Ring Lampung ISG ketuane kang Khairil Anwar, Sumatera Selatan kang H. Suroso, Babel kang Yanto, Bengkulu kang Sedarto, Jambi kang Junarto, Sumbar kang Saiin, Riau kang H. Ali Surahman, Sumut kang Mislan, lan Aceh kang Eko Nurcahyo.
   Liwat pideo kanggo ngucapaken selamet mengeti telung taun ISG, Bupati Banyuwangi Ibu Ipuk Fiestiandani ngarepaken dulur-dulur Ikawangi milu nggawe arum aran Banyuwangi ring tanah boroan lan uga ngarepaken supaya dulur-dulur bisa milu ngewani kontribusi positip nyang tanah kelairan.

Redaktur menerima berbagai tulisan, kirimkan tulisan anda dengan mendaftar sebagai kontributor di sini. Mari ikut membangun basa Using dan Belambangan.


Editor: Hani Z. Noor