Kiprah Mahasiswa Banyuwangi ring Surabaya
Hasan Sentot (dipublikasikan pada Kamis, 14 November 2019 09:31 WIB)
- Laporan
Sak suwene 24 taun, Kesatuan Pelajar Mahasiswa Banyuwangi Surabaya (KPMBS) ring Universitas Islam Negeri Sunan Ampel (UNINSA), buru sore iku nggelar acara gedhe-gedhean. Acara hang diarani Gebyar Budaya Belambangan, njuwut tema Semebrung Arum Tekade Lare Blembangan. Karepe teka tema mau, lare-lare palajar lan mahasiswa asli Banyuwangi ring Surabaya, mane terus merujuk karepe belajar patheng, pungkasane kadhung ana asile engko bisa nggawa aran arum Banyuwangi dhaerah asale.
Acara iku ditekani Wakil Bupati Banyuwangi, Yusuf Widiyatmoko. Anggota DPRD Jawa Timur teka Banyuwangi, Makmulah Harun, pengusaha Banyuwangi hang sukes ring Surabaya, dosen lan warga Banyuwangi hang guyub ring IKAWANGI Surabaya lan Malang padha milu teka. Kursi ring Gedung Auditorium ebek, malah hang lungguh ring tribun gedhung uga akeh mahasiswa.
"Isun ngucap kesuwun seru ambi adik-adik pelajar lan mahasiswa hang ana ring KPMBS. Isun seneng seru, temakaken lare-lare iki masiya adoh teka tanah kelairane, taping tekad nguri-uri lan nguripi kesenian Banyuwangi gedhi seru. Muga-muga mbesuk bisa dari generasi penerus, bisa ngabdi nang tanah kelairan kanggo mbangun dhaerah", gedigu ujare Wabub Banyuwangi noring sambutane.
Wabub kaya sing percara, ndeleng ramene acara iku sampek ditekani wong akeh. Malah sakat acara diangkati, wong nong gedhung kaya kesirep ambi laku dayane hang njoged. Acara iki nekakaken lare-lare Banyuwangi hang kuliah ring Sekolah Tinggi Karawitan Wilwatikta (STKW) Surabaya. Wayah nggawa tari Jejer Gandrung lan Jaran Goyang, akeh penonton hang kauk seneng serta metu lan mungkasi jogedane.
"Bek, apik seru penampilane lare-lare STKW iki. Pancen sekolahe nang kerawitan, makane carane tampil nambuh lan njogede pas seru. Maning-maning kadhung ana acara IKAWANGI ring Surabaya lan Sidoarjo, nak ngundang lare-lare iki bain", ujare Widiantoro, ketua IKAWANGI Surabaya.
Semono uga anggota Dewan teka Fraksi Kebangitan Bangsa (FKB DPRD Jawa Timur) Makmullah Harun, sing bisa nyengidakaken rasa senenge ndeleng pentase lare-lare KPMBS. Makmullah uga siap mbantu lare-lare Mahasiswa, kadhung ana kerepotan nong acara-acara sak teruse. "Isun iki mau, kudune dina iki nyang Jakarta rapat. Naming kok ya wurung, aju milih teka merene. Temekaken sing rugi, merga kecaruk adhik-adhik kabeh", jare anake Kyai Harun Tukangkayu iki.
Masiya acara wis entek, wong-wong hang nonton, paran maning anggota IKAWANGI, sing agage ninggalaken panggonan. Ana hang rebutan potrek ambi Wabup, akeh uga hang milu munggah genjot lan njoget bareng ring gendhing penutupan.
Redaktur menerima berbagai tulisan, kirimkan tulisan anda dengan mendaftar sebagai kontributor di sini. Mari ikut membangun basa Using dan Belambangan.
