Kaya dene Labuh Tandur, wong Using ngawiti panen parine (Labuh Gampung) kelawan donga lan nggelar selametan minangka ngucap sukur nyang Gusti Alloh hang wis ngewani rejeki, hang wis njaga parine padha selamet sakat ditandur sampek panen.

  Dongane bisa beda teka siji desa nang desa liyane taping nduweni semangat hang padha. Ring Dukuh Talunjeruk, Glagah, jare sesepuh desa Kang Usik, prosesi kawitan, pari ring uwangan digampung akehe pitung jalang. 

   Selametane ana pecel pitik hang diwadhahi ithukan (arupa cekeker, endhas, rempela, ati, telampikan), kinangan (arupa ithuk godhong gedhang hang diiseni suruh, enjet, gambir), sega hang dipangan bareng-bareng ring pinggir kedhokan.

    Sakmarine pari dijuwut pitung jalang, ana wong wadon tuwek hang ngerapal mantra:

Srinjana Srinjani

aja kaget ana pedhang kemelawang 

nigas jangganira

Mergane wis wayahe

padha mulih nyang bale tajug

sak dulurira padha ejaken turu 

noring bale tajug 

bantale bantal ules kepakisan 

 

Dongane selametan labuh nggampung:

Bismillahirrahmanirrahim

Gusti kang paring nikmat nyang sakabehe umat 

Kang akehe tampa kira-kira

Senajana kula sakeluwarga kadhang kala numpuk dosa

pitangane kaya tumpukan pasir segara sak antero

Taping Gusti tetep mbukak lawange rejekinkula

Mugi Gusti lantaran uwohe pari niki sakeluarga paringana sehat jiwane lan badhane kanggo mbangun keluwarga kang kuwat

Amin

   Srinjana srinjani (aran kanggone pari sak jodho, ring desa liya ana hang nyebut sringgana sringgani), hang tepak Labuh Tandur dititipaken nang Ibu bumi supaya dijaga, saiki wayahe diajak mulih ring umah minangka rejeki teka Gusti Pengeran.

   Pari iki diyakini minangka salah siji lawang dienggo mbukak rejeki liyane.