Pasar Latar Desa Aliyan

Moh. Syaiful (dipublikasikan pada Sabtu, 12 Oktober 2019 08:14 WIB)
- Laporan



            Saiki angger dina Sabtu ring pelataran desa Aliyan dianakaken Pasar Latar. Ring Pasar Latar iki sembarang kalir panganan desa Aliyan digelar ring kana. Ana panganan hang arupa jajan tradisional sampek panganan olahan sega. Sasate panganan khas hang digoleti uwong-uwong Banyuwangi saiki wis ana. Hang aran gule menthok, pelasan uling, lan pelasan welut uga ana. Sing luput uga olahan hang khas teka desa Aliyan yaiku Sangar Manuk utawa Sangar Dheluk.

            Sakliyane panganan lan ombenan uga didhasar maneka rupa barang cangkingan hang keneng digawa mulih. Kaya dene kopi bubukan hang wis diwadhahi bungkus kertas utawa plastik lan barang-barang kerajinan hang keneng dicangking dienggo ulih-ulih.

            Pasar Latar hang digelar rong minggu sepisan saban dina Sabtu ring pelataran Balai Desa Aliyan iki mangkat sakat mari Ashar sampek jam sanga bengi. Naming ring dina Sabtu tanggal 5 Oktober 2019 sore ika, magih jam pitu bain kabeh panganan wis entek. Pungkasane pasare wis tutup. Guyub rukune hang nekani lan hang nukoni pasar anyar iki mula bisa diuweni jempol. Iki wujud silaturrahime masyarakat Aliyan hang duwe rasa guyub gelem serawung nyang tangga sakubengane.

           Jare Anton Sujarwo, Kepala Desa Aliyan, Pasar Latar iki dikarepakaken sakliyane kanggo ngunggahaken ekonomine rakyat ring desa Aliyan, uga kanggo nguripaken maning UMKM hang ana ring desa Aliyan iki. Camat Rogojampi, Bu Nanik Machrufi ujar kadhung ubege desa Aliyan hang inovatif iki kudu didhukung ambi pemerintah. Mula iku iyane terus sing leren-leren nyemangati desa Aliyan makene terus jenggirat tangi nuju nyang desa hang makmur lan kuwat njaga tradisine. Merga wis anjrah ring endi-endi kadhung desa Aliyan iki mula wis jejeg ulihe njaga tradisine kayata adat tradisi Keboan Aliyan.

            Anton Sujarwo uga girang weruh nyang guyub rukune uwong-uwong desa Aliyan hang nekani Pasar Latar iki. "Sedhilut bain panganan hang diedol wis entek, garus pokoke," gedigu Anton nambahi penjelasane. Sakliyane nggelar dodolan panganan utawa kuliner khas desa Aliyan, ring kana uga digelar kesenian khas desa Aliyan, kaya hang digelar ring dina Sabtu tanggal 5 Oktober ika, ana gelaran “Munsing” yaiku lare enom-noman Aliyan hang nabuh terbang jak akehan (massal).

Muga-muga bain mengarepe engko Pasar Latar iki saya akeh hang dodol lan bisa nambah pengasilane uwong-uwong desa Aliyan hang dodolan ring Pasar Latar, gedigu penjaluke Anton Sujarwo ring pidhatone tepak mbukak Pasar Latar.

Redaktur menerima berbagai tulisan, kirimkan tulisan anda dengan mendaftar sebagai kontributor di sini. Mari ikut membangun basa Using dan Belambangan.


Sumber : Pasar Latar Aliyan

Editor: Hani Z. Noor