Pilem Banyuwangi Ditanting Tayang ring Malaysia
Antariksawan Jusuf (dipublikasikan pada Sabtu, 30 November 2024 08:46 WIB)
- Laporan
Pilem anyar asli 100 persen Banyuwangi "Rindu yang Bertepi" wis ditanting lan ditawani arep tayang ring Malaysia.
"Ya iki wis ana hang nawani tayang pileme nong Malaysia, tiket lan sembarange ditanggung," jare produsere Kang Idrus Efendi nang belambangan.com.
Pilem layar lebar hang dawane 102 menit iki diproduksi PH Chandra Abhipraya Production lan arep tayang ring bioskop Banyuwangi jaringan NSC (New Star Cineplex) Banyuwangi, NSC Genteng, NSC Cluring tanggal 16-22 Desember.
"Sekaliyan dienggo ngerayakaken Hari Jadi Banyuwangi 18 Desember," jare humase Arif Laros. Pileme nganggo basa Indonesia lan nampilaken panggonan-panggonan kelenceran hang durung pati akeh diambah wong kayata pantai muara Badug ring kecamatan Pesanggaran.
Pilem hang disuting nganggo pideo (dudu seluloid) iki ngentekaken bandha kira-kira 480 juta.
"Kene ngarepaken pileme ditonton 10 persene wong Banyuwangi bain wis apik," jare Kang Idrus hang saben dinane megawe dadi konsultan pajak. Wong Banyuwangi ana kira-kira 1,7 juta. "Kira-kira wong 100.000 bain hang nonton apik wis."
"Pilem iki 100 persen produksi Banyuwangi. Teka produsere, PHne, sutradarane, bintang-bintange kabeh Banyuwangi. Setengahe ya dienggo nguripi industri pilem nong Banyuwangi," jare Kang Idrus.
Setemene Idrus wis nyobak mbukak pasare kanggo wong-wong Banyuwangi diaspora hang kesebar sak nusantara.
"Wis ngomong nang NSC Banyuwangi nawi bisa muter pileme nong dhaerah liya. Kadhung hing bisa nasional ya paling using ring Jawa Timur," jare Kang Idrus.
Iyane ya wis ngontak Ketua Ikatan Keluarga Banyuwangi (Ikawangi) Pusat Pak Rusdi Maksum nawi bisa nggeret anggotane kadhung pileme ditayang ring biskop ring kutha-kutha hang ana Ikawangine. Taping durung ana ucap sepakat paran-paran.
"Rindu yang Bertepi" disutradharai Tsanie Fanie lare Singojuruh lan bintang-bintange kelebu Yon DD (pengarang gendhing Banyuwangi lan penyanyi), Dwi Ikawati, M. Al Firmansyah, Lara Anggie Rukmana, lan Fida AP.
Seperene pilem Banyuwangi hang melebu ring bioskop buru ana pilem cendhek.
Redaktur menerima berbagai tulisan, kirimkan tulisan anda dengan mendaftar sebagai kontributor di sini. Mari ikut membangun basa Using dan Belambangan.
