Java-Instituut lan Sejarah Gandrung

Antariksawan Jusuf (dipublikasikan pada Selasa, 27 Agustus 2024 06:38 WIB)
- Opini

Ngomongaken sejarah hang wis ketulis lan impormasi hang dadi pitudhuh penting bab gandrung, hing bisa dilalekaken kiprahe Java-Instituut, sewijine kumpulan hang ngadeg tanggal 4 Agustus 1919 ring Surakarta. Hang ngedegaken yaiku P. A. A. P.  Prangwadono (mbisuke arane dadi Mangkunagoro VII),  R. Dr.  Hoesi  Djajadiningrat,  R.  Sastriwidjono,  lan Dr.  F. D. K.  Bosch. 

   Anggaran Dasar Java-Instituut nyebutaken tujuwan utamane kumpulan iku nyurung merujuke kebudayaan Jawa,  Madura,  Sunda lan Bali kelawan arti hang sak wera-werane. Kanggo nggayuh tujuwan iku kumpulan iki ngelumpukaken lan ngubar sak akehe impormasi ngenani kabeh perinthilane kebudayaan Jawa,  Sunda,  Madura lan Bali. Iwuh kumpulane iku kelebu kongres, pameran, ceramah, sayembara, pagelaran wayang, penerbitan majalah lan buku, uga nggawe museum lan sekolah kerajinan tangan. 

   Teka pirangane kongres hang dianakaken Java-Instituut, ana rong kongres hang ngomongaken Gandrung Banyuwangi, yaiku kongres taun 1921 ring Bandung lan 1926 ring Surabaya. 

   Hang kawitan taun 1921, wong Landa hang ngerabi wong Belambangan lan manggon ring Licin Banyuwangi, anggota ahli Java-Instituut T. Ottolander hing nduweni cerita akeh bab gandrung merga tulisan hang bisa ngewani pitudhuh bab gandrung hing ana sedurunge. Iyane malah ngelu kepileng tepak panitiyane njaluk alihbasa gendhing-gendhing gandrung,  merga akeh ucap-ucap ring dialek Banyuwangi hang sara anggone dialihbasa nyang basa Landa. Endi maning hing ana cathetan sejarah lan etnografi musik gandrung.

Kerana penjalukan iki lan asile hang digawa ring kongres iku, Ottolander bisa diarani wong hang kawitan nulis teks karya sastra (sastra arti sakbenere yaiku ketulis) Banyuwangi nganggo aksara latin. Ana 13 sair gendhing gandrung hang dicathet. Sedurunge, kabeh sastra Belambangan ditulis nganggo aksara carakan (hanacaraka) utawa Arab Pegon (aksara Arab hang nyeliwah) kanggo nulisaken uni-uni basa Jawa hang hing bisa ditulis nganggo aksara Arab normal.

   Pungkasane Ottolander,  hang ngewani judhul ater-atere "Gandroeng van Banjoewangi"  bisa sukses nggelar gandrung hang kawitan dianakaken ring njaba Banyuwangi. Masiya bisa dibayangaken sarane kelendi nggawa rombongan panjak hang sedina-dinane megawe nong kedhokan lan gandrung perawan hang kudu dijaga ambi keluwargane. Kelenceran Banyuwangi-Bandung jaman semono mesthine mbutuhaken wektu pirangane dina, malah pirangane minggu. Hing ana kendharaan hang langsung, mesthi mandheg ngepos nong pirangane kutha.

   Tulisan hang lebih gamblang lan jangkep bab gandrung, kelebu sejarah, musik lan bandhingane ambi kesenian liyane ring tanah Jawa, ditulis ambi Joh. Scholte. Taun 1926, tepak kongres ring Surabaya Scholte ring ceramahe hang nduweni judhul padha "Gandroeng van Banjoewangi" njelentrehaken gandrung sakat teka musike, sejarahe, lan kelendi jugedan gandrung digelar.  

   Wong Banyuwangi saiki nduwe pitudhuh sapa gandrung wadon kawitan njumbul taun 1895, yaiku Semi anake Mak Mida wong Cungking hang magih miloni agama Hindu Jawa, uga merga teka ceramahe Scholte ring kongres iku.

   Uga omongane Mak Mida hang saiki dadi pengenget kabeh wong, bab kelendi bibit perkawit gandrung wadon merga Semi hang magih umur 10 taun kadheman seru hang hing ana tambane: "Kadhung Sira mari, Sun dadekena seblang,  kadhung sing mari ya using." 

   Scholte uga nyeritakaken, bengene gandrung iku digawakaken ambi lancing hang mider teka desa siji nong desa liyane ambi para panjake lan diwani hadhiyah beras ambi penontone.    

(Ana sambungane)

Redaktur menerima berbagai tulisan, kirimkan tulisan anda dengan mendaftar sebagai kontributor di sini. Mari ikut membangun basa Using dan Belambangan.