Kejayan Roh Macan Putih (Bagiyan 1 teka 2)

Antariksawan Jusuf (dipublikasikan pada Kamis, 26 September 2024 08:53 WIB)
- Opini

Kejayan Roh Macan Putih (Bagiyan 1 teka 2)
Ditulis ring Hasnan Singodimayan

Kesatuan hang paling diagul-agulaken ning Banyuwangi yaiku Bataliyon Macan Putih. Ngiringi Prabu Tawang Alun hang ngalih panggonan nalika diserbu Kompeni. Nyatane nalika perang gerilya tahun 1947-1949, Bataliyon Macan Putih ngambahi panggonan hang diambahi Macan Putih.
   Pindhah-pindhah panggonan merintah, masiya melakune kuwalik. Dudu teka Kedawung, Bayu, Kebrukan, Kutha Lateng, lan Tirta Arum. Taping teka Tirta Arum sampek ngambah nyang Puger Jember, panggonan hang uga asal mulane Sayu Wiwit.
   Kadhung Bataliyon Macan Putih, bisa nelusuri sejarah Tawang Alun, mesthine keneng dienggo arane dalan ning kutha, kanggo pengenget sejarah lokal, aja mung sejarah nasional. Merga cukup ning kutha gedhi kaya Jakarta lan Surabaya, hang jalur dalane akeh.
   Aran desa, aran dhukuh, aran panggonan, aja diganti miturut ukuran nasional. Lare-lare saiki padha sing weruh hang aran Biskalan, Kulandan, Kempon, Klembon, Kelampok, Bengkalingan, Gerobokan, Gemblungan, Sawahan lan liya-liyane hang magih akeh.
   Untunge untung, warga magih duwe cerita rakyat hang bisa dienget-enget kelebu cerita rakyat hang dianggep mitos, hang bisa diarani situs lan ritus.
   Merga jare uwong saiki diarani “Khazanah Budaya”, kekayaan intelektual hang kudu diuri-uri, merga akeh-akehe ana hang dikarep nyang cerita iku. Jare kalangan terpelajar diarani “Kearifan Lokal”. Pitudhuh kanggo anak turun “Hang apik aja ditampik, hang elek kudu diseleh kaya tembelek.”
   Taping magih akeh uwong hang durung patiya ngarti, maknane “Khazanah Budaya” miturut kajian akademik. Merga budaya “Santhet” Banyuwangi, bisa ditetepaken dadi Khazanah Budaya. Merga santhete wong Using, beda ambi sihir.
   Mantrane sing ana wacan Arab, paran maning ditambahi Lafal lan tulisan Rajah, merga mantrane nganggo Cara Using deles, hang meh padha ambi gendhing-gendhing gandrung lan Seblang, mung sithik lan cendhek-cendhek. Aran santhete, nganggo arane kewan umah-umah hang sikile papat: Jaran, Kebo, Sapi, Babi, Asu, Wedhus lan Kucing. Tuladhane: Jaran Goyang, Wedhus Kelumus, lan Kucing Gorang.
   Perlu lan tujuwane, nganggo ngapokaken sapa bain hang nyulayani “Kearifan Lokal". Lare wadon hang rumangsa dadi sisik melik, disapa kancane apik-apik, diulati rai silite pitik. Telung dina engkas disanthet “Jaran Goyang”, dadi kaya lare edan, celuk-celuk lare lanang hang kapiran mau.

   Tuladha liyane santhet “Kucing Gorang.” Bakalane uwong dipelayokaken, merga awake rumangsa gantheng lan sugih. Sak umur-umur, umah-umah sing tahu anteng. Gorang terus kaya kucing, merga barang sepele. Kuwalat teka wadanan BKL[1]. Gedigu iku abote nyulayani kearifan lokal ning Banyuwangi. Magih akeh hang aran santhet ning Banyuwangi, taping sing sampek nelangsakaken uwong, paran maning sampek tekane patine. Beda ambi hang aran SIHIR.
   Ana cerita rakyat hang sampek saiki durung merakyat, taping arane semebyar nyang endi-endi, yaiku hang aran panggonan hang nganggo aran-aran SINGO. Ana Singomayan, Singonegaran, Singodilagan, Singotrunan, Singojuruh, lan Singolatren, lamat-lamat ana hang aran Singomumpuni.

[1] BKL, cara cekak Bakale, cara lare bengen ngelokaken kancane, kayata Januri BKL Atun. Ditulis nong tembok-tembok ambi godhong utawa kereweng. Dhemen ambi lare wadon bisa diBKL dhewek, ngewadani kancane ya nganggo BKL.

Redaktur menerima berbagai tulisan, kirimkan tulisan anda dengan mendaftar sebagai kontributor di sini. Mari ikut membangun basa Using dan Belambangan.