Sri Tanjung lan IKON

Antariksawan Jusuf (dipublikasikan pada Senin, 23 September 2024 08:18 WIB)
- Opini

Sri Tanjung lan IKON

Ditulis ring Antariksawan Jusuf

Tanggal 23 Agustus 2024, Lontar Sri Tanjung wis ditetepaken minangka Ingatan Kolektif Nasional (IKON) ambi Perpustakaan Nasional lan sertipikate dielungaken marek seminar nasional tanggal 19 September sore.

Cerita Sri Tanjung kelebu salah siji cerita hang ditulis ring lontar hang has Belambangan, jare peneliti Landa P.J. Zoetmulder ring bukune “Kalangwan”. Cerita-cerita kaya iki ring abad 17 sampek 18 has anane ring Belambangan, minangka kerajaan Hindu pungkasan ring Pulo Jawa. Masiya cerita-cerita iku wis diukir ring relief-relief candhi jaman Majapahit. Hing kaya cerita-cerita lontar hang ditemokaken ring bagiyan Jawa liyane, lontar hang ditemokaken ring Belambangan tokoh utamane wong biyasah. Dene ring Jawa lontar-lontare ceritane bab raja lan keraton.

Relief cerita Sri Tanjung ditemokaken ring Candi Penataran parek Blitar. Sing maido, candhine diconto lan dibangun ring Taman Blambangan. Paduraksa iku dibangun tepak Banyuwangi dipimpin ambi bupati Joko Supaat Slamet (1966-1978) ring bungase taun 1960an.

Panataran iku minangka bangunan suci hang dibangun atusan taun. Teka angka-angka hang diukir ana ring patung penjaga dwaraphala nganggo aksara Jawa Kuna, kewaca angka 1214 Saka utawa 1292 Masehi. Ring salah sijine prasasti watu ana pisan angka 1119 Saka utawa 1197 Masehi dietokaken ambi Raja Srenga teka Kerajaan Kediri. Isine yaiku peresmian salah siji perdhikan kanggo kepentingan Sira Paduka Batara Palah. Para ahli nduweni penemu gok Palah hang dimaksud iku ya Candi Penataran iku saiki.

Ring kawasan percandhian Panataran ana relief-relief hang diukir muter sak ubengane candhi, ring mburine dwaraphala lan ring temboke kolam. Ana wolung cerita ring tembok-tembok iku, salah sijine yaiku Sri Tanjung hang ana ring pinggir kulon lan terus sampek ring tembok kidul ring pendhapa teras.

Reliefe mau kewaca kelawan urutan hang muter walikane arah edome jam (prasawya). Cerita Sri Tanjung iki hang dianggep minangka cerita asal-usul kutha Banyuwangi. Cekake ceritane Patih Sidapeksa dikongkon Raja Sulakrama ring negara hang aran Sindureja kanggo nggoleti tamba nyang sawijining begawan hang aran Tambapetra ring desa Prangalas. Tamba cumpu hing ulih taping iyane ketiban welas nang putune Tambapetra hang ayu yaiku Sri Tanjung. Iyane iku anak wadone Sadewa, dulur paling enom teka Pandawa Lima. Cekak ceritane, Sidapeksa njuwut Sri Tanjung dadi rabine. Tepak digawa mulih nong Sindureja, rajane milu kesengsem nang rupane Sri Tanjung hang ayu.

Raja nggolet cara kelendi carane mateni Sidapeksa kelawan cara hang alus hing ketara. Aju iyane ngewani tugas nyang Sidapeksa golet emas lan benang telung gelung nyang kahyangan. Sidapeksa digawani surat lan nuju kahyangan. Tepak miber mendhuwur, Sidapeksa ndeleng mengingsor, elor alas, kidul alas, kulon gunung lan wetan segara. Cumpu isi surate hang digawa Sidapeksa iku pitenah gok wong hang nggawa surat iku arep ngerusak kahyangan. Sakkal iyane diajar ambi para dewa hang njaga kahyangan kelebu Pandawa Lima. Tepak wis kelenger, iyane nyebut gok magih keturunan Pandawa. Iyane wurung dipateni malah digawani emas lan benang kaya penjalukane raja.

Tepak Sidapeksa gadug kahyangan, rajane wis yakin gok Sidapeksa bakale mati, hing kira iyane menang lawan dewa-dewa hang ana ring kahyangan. Iyane ngawiti njala sutra nang Sri Tanjung lan ngerum-rum makene Sri Tanjung welas nang raja. Taping Sri Tanjung lare wadon hang setiya. 

Weruh Sidapeksa cumpune bisa balik lan nggawa pesenane, raja nggolet cara mitenah Sri Tanjung, ngomong nyang lakine gok Sri Tanjung wis laku selingkuh tepak ditinggal lakine. Pitenahe digugu ring Sidapeksa. Iyane muntab lan mateni rabine ring setra Gandamayu (getihe Sri Tanjung aju mambu wangi).

Ring tengah dalan nuju alam arwah, ruwahe Sri Tanjung nunggang iwak sampek kecaruk  Betari Durga. Merga durung wayahe mati, ruwahe dibalekaken maning nong jasade. Sri Tanjung urip maning lan balik nyang desa Prangalas panggonane kakike hang begawan.

Marek mambu getihe hang wadon wangi, Sidapeksa weruh gok rabine hing salah. Iyane emeh edan lan emeh mungkasi uripe dhewek. Emane ana Betari Durga hang teka nulung lan ngongkon Sidapeksa menyang nang Prangalas. Sritanjung gelem nemoni lakine kelawan sarat lakine bisa nugel gulune rajane hang endhase arep dienggo keset. Ditulungi wong-wong Prangalas, Sidapeksa bisa ngalahaken raja Sulakrama. Pungkase wong keloron urip seneng saklawase. Cerita Sri Tanjung setemene cerita happy-ending lan dudu mandheg tepak Sidapeksa mateni Sri Tanjung lan getihe mambu wangi.
 

Serat Sri Tanjung
Ring basa tulis (sastra), jare Prof. Poerbatjaraka, Serat Sri Tanjung diceritakaken nganggo basa Jawa pertengahan lan ditulis nganggo aksara carakan. Kira-kira serat Sri Tanjung iki sak umuran ambi serat-serat Dewa Ruci, Sudamala, lan Serat Kidung Subrata dan Serat Panji Angreni hang nganggo basa Jawa kuna pertengahan taping kategorine enom. Hang nggawe kaju, Cerita Sri Tanjung iki wis anjrah ditemokaken ring Banyuwangi, Bali lan sak ubengane, dene ring panggonan liya hing ana.

Ring perkembangane, tepak Majapahit jaya-jayane, wis ana siji loro hang wis nganut agama Islam. Jumlahe saya akeh utamane ring pinggiran pesisir kaya ring Tuban, Sedayu lan Gresik. Saya suwi saya akeh wong hang milu agama Rasul utamane para intelektual lan keluwarga kerajaan. Merujuk pisan hang aran sastra nganggo basa Jawa hang isine bab agama Islam. Uga kawitan anane sastra hang ditulis nganggo aksara Arab Pegon. Pungkasane Sri Tanjung ya ana hang ditulis nganggo Arab Pegon.

Sak liyane Sri Tanjung, ana uga “episode” sedurunge hang nyulungi yaiku Sudamala. Hing kaya kidung-kidung Jawa liyane, Sudamala lan Sri Tanjung iki nduwe sipat kerakyatan. 

Redaktur menerima berbagai tulisan, kirimkan tulisan anda dengan mendaftar sebagai kontributor di sini. Mari ikut membangun basa Using dan Belambangan.