Tapsir Layar Kumendhung (Bagiyan 1 teka 2)

Antariksawan Jusuf (dipublikasikan pada Jumat, 20 September 2024 07:29 WIB)
- Opini

TAPSIR "LAYAR KUMENDUNG” (Bagiyan 1 teka 2)

Anggitane: Elvin Hendratha

Akeh-akehe wong padha mupakat, kadhung “Layar Kumendhung” minangka gendhing hang ngadeg dhewek. Naming kanggo njelentrehaken, ana apike mbukak bareng buku “Gandrung Itu Bukan Seblang” anggitane Fatrah Abal nong lembar nomer 48. Bisa sun ringkes, miturut Fatrah Abal setemene “Layar Kumendhung” iku pedhotan gendhing Sekar Jenang hang sumbere teka untingan gendhing tradisi Seblang.

Gendhing-gendhing Seblang minangka sewijine dalan cerita hang sambung-sambungan, kaya reroncen Kembang Dirma. Gendhing Seblang minangka peninggalan hang paling kuna, mangkane kanggo ngurut pecak lakune paran hang dadi pitakon “Layar Kumendhung,” paling pas yaiku ngurut cathetan-cathetan Gendhing-gendhing Seblang dhewek.

Noring cathetane Fatrah Abal, ujar lan gendhing ‘Layar Kumendhung’ ditulis kaya tatanan ngisor iki:

Sekar Jenang

Sekar-sekar jenang

Maondang dadari kuning

Temuruna ageng alit

Kawula nyuwun sepura

Layar-layar kumendhung

Umbak umbul ring segara

Segarane tuan agung

Tumenggung numpak kereta

Lilira Kantun

Sang Kantun lilira putra

Sapanen dhayoh rika

Mbok srungkuba milu tama

Lilira guling

Sabuk cinde ring gurise

Kakang-kakang ngelilira

Sawah bendha ring selaka

Nggatekaken cathetan Fatrah Abal ring ndhuwur, ana pirang-pirang perkara hang arep sun sampekaken, yaiku:

1. “Sekar Jenang” ambi “Layar Kumendhung”.

Fatrah Abal jelas nyathet noring buku bab lirik gendhing, kelawan judhul Sekar Jenang. Artine gendhing iku jelas diarani Sekar Jenang, dudu ‘Layar Kumendhung’. Ujar ‘Layar Kumendhung’ buru ditemoni ring larik kawitan teka bait keloro.

Noring tontonan gandrung terob ambi nggawa Gendhing-Gendhing Seblang, kerep ditembangaken gandrung kelawan cara cekak. Gandrung kerep madhetaken gendhing kanggo nuruti lan madhakaken: kahanan panggung, ambi dawane gendhing, kepingin lan karepe hang ndeleng, ambi kelendi maceme penonton.

Tugelan bait ana ring gendhing, pungkasan melungsungi dadi gupilan-gupilan gendhing anyar. Sak unting lirik gendhing hang biyasah ana papat utawa lebih, diuwah dadi mung rong bait bain. Angger mari nembangaken rong bait, gandrung biyasahe nggawakaken gendhing “anyar” hang diebeki ambi ‘Basanan’ utawa ‘Wangsalan” hang iku mau nuruti penjaluke penonton.

Liwat cathetan gendhing ring ndhuwur mau, isun percaya Fatrah Abal nggolongaken bait-bait ‘Layar Kumendhung’ minangka bagiyan teka gendhing Sekar Jenang. Tugelan gendhing wutuh Sekar Jenang hang ditembangaken, pungkasane dadi cendhek anyar, hang aju diarani wong-wong akeh dadi ‘Layar Kumendhung’.

Tradhisi mungges lirik lan gendhing ring kalangan seniman lan hang “nata jugedan” ring Banyuwangi, magih kerep kedaden lan dianggep biyasah sampek seperene. Paran maning jamane gandrung kaset. Kudune dibedakaken antarane lirik “gendhing bebas,” lan “gendhing temali” hang pasthine duwe pakem dhewek. Malah ring seni gendhing-gendhing Banyuwangi, bebas iku dhewek tegese bebas naming ana sarate. Kaya ring Gendhing ‘Gurit Mangir’. Nyilih istilah Nanang Yuswantoro Zuniar,  budayawan enom pentholane OmpRock, "Bebas tegese sakmarine larik basanan kawitan, basanan hang sakteruse ulih lan bebas sak karepe, paran jare penembang. Bersyarat tegese wis dadi pelanggeran larik basanan kawitan iku wajib hukume kudu ana pengucap (kata) GURIT."

2. Judhul utawa Aran gendhing.

Gendhing Sekar Jenang noring buku Fatrah Abal, ana petang bait. Saben bait, ana petang larik hang ana kaitane ambi siji lan sijine. Laku nugel lirik wutuh dadi rong bait bain, ndadekaken laire gupilan bait-bait hang diarani anyar. Aran gendhing anyar iku dienggo tetenger, biyasahe mampaataken ujar ring larik kawitan teka rong bait hang ditembangaken. Damakena judhul-judhul gendhing kayata: ‘Layar Kumendhung’, ‘Kembang Menur’, ‘Kembang Gadhing’, ‘Kembang Abang’ lan liya-liyane, cumpu  dijuwut teka ujar-ujar kawitan noring bait, teka sak untingan wutuh sakwijine gendhing utama.

3. Urutan Bait.

Urutan bait hang sumbere teka cathetan Fatrah Abal, beda ambi urutan bait teka lirik hang digawakaken ambi gandrung. Gandrung Supinah lan Gandrung Koesniah, ndelehaken urutan bait kapindho Layar Kumendhung ana ring kawitan gendhing. Akibate, ngarani gendhing mau aju mingser dadi ‘Layar Kumendhung’, padha nyang tradhisi nguweni aran mauka.

Bait kawitan ‘Sekar Jenang’ malah dipanggokaken ring pungkasan bucune gendhing dienggo “klimaks.” Malah akeh hang nganggep kadhung bait lirik ‘Sekar Jenang’ iku ngadeg dhewek, dudu bagiyan teka gendhing hang diarani anyar ‘Layar Kumedhung’. Bisa bain Fatrah Abal hang salah nyathet, utawa bisa uga gandrung dhewek hang nyeja nguwah panggonan bait, merga iyane rumangsa bisa narik kepinginane penonton, supaya gendhing dadi melaku mendhuwur teka kahanan hang nyenengaken, sampek mupus gendhing tambah gancar lakune.

Uwahe urutan bait iku, bisa uga anane sumbangan salah ngarepaken para pelaku seni ring jaman sakwise penganggit gendhing. Kaya tuladhane larik: ‘Kawula nyuwun sepura’. Ukara iki ngemu teges ‘Isun njaluk sepura’, ukara hang biyasahe dijalukaken sewijine uwong ring pungkasan ketemu. Kedaden salah paham nong karepe njaluk sepura: setuhune ditujokaken lan dikarepaken kanggo sapa? Bedane anggepan nang “sapa hang dadi lakon” lan “tembung ukara”, nggarahi urutan lirik Fatrah Abal (kadhung cathetan Fatrah Abal mula bener), mesthi ditujokaken nang lakon hang diceritakaken, dudu nong penonton utawa wong hang ngerungokaken. Mecungule pikiran nguwah urutane iku, ndadekaken beda paham ambi hang dikarepaken penganggit gendhing. Njaluk sepura dipikire, mesthi kudu ana ring kawitan ketemuan.

4. Uwahe Ujar.

Delengen nyatane akeh bedane ujar, antarane cathetan Fatrah Abal ambi ujar-ujar hang ditembangkan Gandrung Koesniah lan Gandrung Supinah. Malah Gandrung Supinah katon beda ambi Gandrung Koesniah wayah ngucap ujar: “lilira-lilira” ambi“lira-lira”.

Noring laku ngelestarekaken, pidekan teka lirik ujare kerep sing pati jelas. Mergane laku mau, mung sewates diulangaken teka omongan nang omongan. Bedane ujar iku mau bisa mecungul, merga anane salah perungon utawa salah ucap. Teka salah perungon lan beda ngucap ujar iku, ndadekaken uga salah hang dikarepaken penganggit gendhing. Kanggo hang duwe kawigaten mesthi kangelan nemokaken petenge lan sing mupakate antarane siji ambi sijine, ngartekaken makna lirik utawa nyurasa isine.

Maceme pilihan beda ujar iku merga akeh disebabaken teka kuping lan cangkem (antarane salah ucap lan salah perungon), kelebu uga merga teka sithik hang nyatheti jaman bengen. Naming sakwalike bisa uga uwahe ujar mau, aja-aja merga salahe Fatrah Abal wayah nyathet bengen.

Ruwahe Budayawan Hasnan Singodimayan malah tega nudhuh “pengudang” nduwe peran gedhe hang nyebabaken mecungule uwahe ujar lan pilihan ujar, hang setemene dadi penduduh penembang (gandrung) kanggo ngucap lirik terusane.

(Ana sambungane)

Poto: Sulih Budi 

Redaktur menerima berbagai tulisan, kirimkan tulisan anda dengan mendaftar sebagai kontributor di sini. Mari ikut membangun basa Using dan Belambangan.