Tapsir Layar Kumendhung (Bagiyan 2 pungkas)

Antariksawan Jusuf (dipublikasikan pada Sabtu, 21 September 2024 08:44 WIB)
- Opini

Tapsir Layar Kumendhung (Bagiyan 2, pungkas)

Acak damakena uga urutan lirik gendhing hang ditembangaken ambi Gandrung Koesniah lan Gandrung Supinah. ‘Layar Kumendhung” carane Gandrung Koesniah nduweni panggonan urutan bait-bait hang padha ambi carane Gandrung Supinah. Dikawiti ambi ujar ‘Layar Kumendhung’ dipungkasi ambi ujar ‘Nyuwun Sepura’.

 “Layar Kumendhung”

(versi Gandrung Supinah)

Layar-layar kumendhung

Umbak umbul ring segara

Segarane tuan agung

Tumenggung numpak kereta

Lilira-lilira Gileh

Sabuk cindhe ring gurise

Kakang-kakang yara ngelilira

Sawah bendha gelang seloka

Lilira-lilira Kantun

Sang Kantuna lilira yoga

Dhayoh rika mbok Supraba

Milu Tama

Sekar-sekar jenang

Maondang dadari kuning

Temuruna ageng alit

Kawula nyuwun sepura

Gandrung Soepinah nguwalik urutan bait keloro lan ketelu, teka urutan bait lirik gendhing: cathetan Fatrah Abal lan gendhingane Koesniah. Bait ‘Lilira-Lilira Gileh’ (Fatrah Abal nyathete ambi ‘Lilira-Lilira guling’, Koesniah ngucape ambi “lilira-lilira gileh”) dideleh noring urutan keloro. Buru marek iku disambung ambi bait  “Lilira-lilira Kantun” (Koesniah ngucape ambi “Lira-lira Kantun”).

Saiki gatekena rong larik pungkasan bait “Lilira-lilira Kantun”, carane Gandrung Supinah ring ngisor iki :

 Lilira-lilira Kantun

Sang Kantuna lilira yoga

Dhayoh rika mbok Suprobo

Milu Tama

Ukara “Dhayoh rika mbok Suprobo/Milu tama” nemen beda tegese kadhung dibandhingaken ambi cathetan Fatrah Abal, yaiku “Sapanen dhayoh rika/Mbok Suprobo milu tama”.  Kedaden mingser keterangan ambi hang ngelakoni.

Acake saiki delengen uga bait “Lilira-lilira Kantun” teka Fatrah Abal iki :

Lilira Kantun

Sang Kantun lilira putra

Sapanen dhayoh rika

Mbok Suprobo milu tama

Ring kene uga ana bedane teges ujar masiya ana ujar padhanan, kaya hang dilakoni Gandrung Supinah lan Gandrung Koesniah ngarani anak ambi ujar basa “Yoga”. Cathetan Fatrah Abal milih ujar “Putra”. Bedane iki akeh, merga akibate noring bedane dhuwur-endhepe (pangkat) pelakon lan ambi keterangan hang dilakoni.

Ana maning bedane ukara liyane   “Sawah Bendha Gelang Seloka” (larik Gandrung Supinah padha ambi Gandrung Koesniah, noring cathetan Fatrah Abal ditulis “Sawah Bendha ring Seloka”. Anane ujar sambung “ring”, ndadekaken beda tegese.

Ngaji lirik carane Gandrung Koesniah, lebih nyenengaken maning. Nang endi pelayune ujar hang aran ‘Mbok Supraba’? Apuwa Gandrung Koesniah nganggo pilihan ujar 'nunggang", dudu "numpak" kaya anjrahe lirik noring cathetan Fatrah Abal utawa gandhangan suwara Gandrung Supinah hang jelas padha?

Layar Kumendhung

(versi Gandrung Koesniah)

Layar-layar kumendhung

Umbak umbul ring segara

Segarane tuan agung

Tumenggung nunggang kereta

Lira-lira Kantun

Sang Kantuna lilira yoga

Jare Paman yara ngelilira

Sawabendha milutama

Lira-lira gileh

Sabuk cindhe ring gurise

Kakang-kakang jare paman rika ngelilira

Sawah bendha gelang selaka

Sekar-sekar Jenang

Maonda dadari kuning

agung alit Temuruna

Kawula nyuwun sepura

Beda-bedane ujar (pilihan kata), lan pilihan ujar (diksi), antarane lirik cathetane Fatrah Abal ambi tembange Gandrung Supinah utawa Gandrung Koesniah, merga pirang-pirang perkara: salah perungon, keenaken dhewek dhung nembangaken sampek lali, lan bisa merga angenan penembang/seniman dhewek, lali ujar, sing iling, keseleo ucap (slip of the tongue), lan bisa merga salah manggonaken ngepose suwara tepak nembang. Kadhung bedane urutan bait teka ketelu sumber iku mau, bisa bain disebabaken merga: ulihe lali ngiling-iling, salahe pengudang, uga bisa disebabaken merga dipadhakaken ambi uneke tabuhan pengiring.

Acak bandhingaken ambi tembangan bait “Sekar Jenang” Gandrung Sugiati noring album “Jejeran” produksi Moro Seneng Record taun 1979, ambi tembangan teka suwara Gandrung Dartik teka album “Moto Walangen” produksi “Kencono Record” Rogojampi taun 1974. Kelorone jelas beda ring medhot ukara, hang iku kabeh bisa ndadekaken beda ujar. Sugiati ngucap : “Maondada  dari kuning”. Naming Dartik ngunekaken ukara “maonda, ndadari kuning “. Malah Dartik nutup larik kepapat ambi sing kathik njaluk sepura (nyuwun sepura), taping malah mungkasi ambi ukara: “Aja rika terus maonda.”

Noring cathetan Fatrah Abal bait “Layar Kumendhung”  dipanggonaken ana ring pungkasan gendhing, dideleng teka ilmu gendhinge karepe mula melaku edheng-edheng kanggo njaga stamina ring terob. Naming kadhung  bait “Sekar Jenang” dideleh ring pungkasan gendhing (kaya hang ditembangaken  Gandrung Supinah lan Gandrung Koesniah), mula diseja makene penikmat diejak munggah anget, sakmarine digiring ambi gesekan bahola hang kalem.  Kadhung bait ‘Sekar Jenang’ hang dipanggonaken noring pungkasan gendhing (kaya hang ditembangaken Gandrung Supinah lan Gandrung Koesniah), gedigu iku mula kanggo miloni laku supaya nuju tambah anget, sak mareke digiring ambi gesekane bahola hang kalem. Unene tabuhan sak liyane bahola diseja buru dietokaken ring akhir. Nyeja dilakoni gedigu, kanggo nggoleti dalan munggah. Mergane dianggep bisa luwih rame ambi enak dirungokaken kadhung dideleh ring pungkasan gendhing. Iku nawi salah sijine alasan apuwa gandrung keloron mauka ngewalik urut-urutane?

Pungkasan, kanggo bisa nangkep karepe panganggit gendhing. Mula kudu diperlokaken jelentrehan hang nyekabehi. Kadhung arep njelentrehaken gendhing, kudu dideleng gendhing hang wutuh, paling lawas, urut lan aseli, supaya pesen hang dikarepaken penganggit bisa ketangkep lan nyambung.

Ngartekaken gendhing Sekar jenang sing bisa dilakoni kelawan mecah-mecah, tuladhane  mung muser noring sak bait (Layar Kumendhung) bain. Bait “Sekar Jenang” hang rupa kahanan lan laku cerita bisa uga dadi dilalekaken. Noring kebiyasahan “ngeringkes gendhing” hang kerep ngelairaken kethokan ‘gendhing anyar’, nggarahi wong hang duwe kawigaten lan penonton utawa hang ngerungokaken mung muser noring bait iku. Paran maning kadhung angger ujar noring gendhing wis uwah, utawa larik diwolak-walik, uga utawa urutan baite mingsle. Mula kudu dipahami kadhung kurang siji ujar bain teka petang bait mau, bisa nggawe beda tegese, beda pengarepan, lan beda terjemahane. Malah bisa dadi keliru noring karepe penggangit hang ketulis ring gendhing.

Elvin Hendratha

Redaktur menerima berbagai tulisan, kirimkan tulisan anda dengan mendaftar sebagai kontributor di sini. Mari ikut membangun basa Using dan Belambangan.